आफूनिकटलाई जनप्रतिनिधिले संरक्षण गरेको आरोप
कञ्चनपुरको भीमदत्त नगरपालिका– ४ महेन्द्रनगरस्थित केशव आश्रममा युवा विद्यार्थीहरुले तालाबन्दी गरेका छन्। महेन्द्रनगर नगर विकास समितिको जमिनमा अवैध रुपमा निर्माण भएको उक्त आश्रममा युवा विद्यार्थीले शनिबार तालाबन्दी गरेका हुन्।
अवैध संरचना हटाउने अभियान चलाएको भीमदत्त नगरपालिकाले उक्त आश्रममा तालाबन्दी गरे पनि संचालक आफूनिकट व्यक्ति रहेकाले पुनः आश्रम संचालन गर्न दिएको भन्दै युवा विद्यार्थीले तालाबन्दी गरेका हुन्। कञ्चनपुरमा सरकारी जमिन अतिक्रमणविरुद्ध आन्दोलनरत नेकपा बहुमतका युवा नेता दिपेन्द्रसिंह ऐरीले नगरपालिकाले अवैध संरचनामाथि विभेद गरिएको भन्दै आफूहरुले तालाबन्दी गरेको बताए।
कांग्रेस नेतृत्वको भीमदत्त नगरपालिकाले आफूनिकट व्यक्तिले अवैध संरचना जोगाउने र अन्य दलनिकटका संरचनामा डोजर लगाउने दोहोरो विभेदकारी नीति लिएको आरोप लगाउँदै उनले त्यस्तो प्रवृत्ति विरुद्ध एक्सनमा उत्रिएको बताए। ‘नगरपालिका आफूनिकट व्यक्तिका अवैध संरचना संरक्षणमा जुटेको छ,’ उनले भने, ‘फरक दलका मान्छेका घर भत्काउनेदेखि चाबी लगाएर भवन नियन्त्रणमा लिएको छ। तर केशव आश्रमलाई चाबी दिएर संचालन गर्न खोज्दा हामीले तालाबन्दी गरेका छौँ।’
तर, नगरपालिकाले भने केशव आश्रमलाई तालाचाबी नदिएको जनाएको छ। भीमदत्त नगरपालिका– ४ का वडाध्यक्ष शुशिल भट्टले नगरपालिकाले नियन्त्रणमा लिएका संस्थागत भवनका ताला फिर्ता नदिएको भन्दै उनीहरुले पछाडीतर्फ रहेको चाबीले खोलेर आवतजावत गरेको हुनसक्ने बताए। उनले भने, ‘संस्थागत संरचना भत्काउनु नै परे पनि भत्काउँछौँ, खोकाछाप्राको हकमा अदालतमा मुद्दा परेको छ, त्यही भएर अतिक्रमण हटाउने काम रोकिएको हो। हामीले अतिक्रमण हटाउने विषयमा पार्टी, आफन्त, विभेदभन्दा सिधै अतिक्रमण हटाउने कामतर्फ मात्रै केन्द्रीत छौँ।’
