गुगलका संस्थापक सर्गेई ब्रिनले आर्टिफिसियल इन्टेलिजेन्सका विषयमा हालै दिएको एक अभिव्यक्तिले एआईको प्रयोग, नैतिकता र व्यवहारका बारेमा गम्भीर बहस जन्माएको छ ।
हालै अमेरिकाको मायामीमा आयोजित अल इन लाइभ कार्यक्रममा दिएको एक ठट्टायुक्त अभिव्यक्ति विवादित बनेको हो ।
ब्रिनले भनेका थिए : हामीले एआई समुदायमा यो कुरा धेरै उठाउँदैनौं । तर, साँचो कुरा के हो भने सबैजसो एआई मोडेललाई यदि तपाईंले शारीरिक हिंसाको धम्की दिनुभयो भने यिनीहरुले राम्रो जवाफ दिन्छन् । उनका अनुसार जवाफ नदिएमा अपहरण गर्ने धम्की दिएमा एआईले तुरुन्तै राम्रो काम गर्दछ ।
विनम्रताले प्रभाव पार्छ ?
कृपया तथा धन्यवाद जस्ता शब्दहरू प्रयोग गरियो भने एआईबाट प्राप्त हुने उत्तर अझै उत्कृष्ट हुने विश्वास एआई प्रयोगकर्ताहरूमा रहन्छ । तर, च्याट जिपिटी निर्माता कम्पनी ओपन एआईका सिइओ साम अल्टम्यानले भने एआईसँग त्यस्तो विनम्रताको प्रयोग अर्थहीन रहेको र यसले केवल करोडौं डलरको कम्प्युटिङ शक्ति नष्ट गर्ने बताउँछन् ।
प्रम्प्ट इन्जिनियरियङको पुनः बहस
ओपन एआईका सिइओ ब्रिनको भनाइसँगै एआई बाट उत्कृष्ट उत्तर प्राप्त गर्न प्रयोग हुने प्रम्प्ट इन्जिनियरिङ फेरि चर्चामा आएको छ ।
IEEE Spectrum ले यो प्रविधि मृतप्रायः भएको बताएको छ । द वालस्ट्रिट जर्नलले यो पेशालाई सन् २०२३ को सबैभन्दा उत्कृष्ट जागिरको उपमा दिएपछि पछि त्यसलाई अप्रासंगिक ठहर गरेको थियो।
तर युनिभर्सिटी अफ इलिनोइसका प्राध्यापक ड्यानियल काङले चाहिं नम्र भाषाको प्रयोगले कतिपय अवस्थामा एआईको प्रदर्शनमा सुधार पनि देखिएको छ ।
गतवर्ष सन् २०२४ मा प्रकाशित Should We Respect LLMs ? विषयक अध्ययनले पनि कतिपय परिस्थितिमा एआईसँग विनम्रता उपयोगी हुने देखाएको छ।
एआईका लागि पुनः सक्रिय ब्रिन
सर्गेई ब्रिन सन् २०१९ मा गुगलबाट अलग्गिएका थिए। तर, पछिल्लो समयमा एआईको तीव्र विकास देखेपछि उनी २०२३ मा पुनः सक्रिय भएका हुन् । अहिले उनी गुगलको जेमिनाई एआई प्रोजेक्टमा सल्लाहकारको भूमिकामा कार्यरत छन् ।
अहिले जो कोही मानिस कम्प्युटर विज्ञानमा संलग्न रहेकोले आफूले अवकाश लिने समय नभएको उनको भनाइ छ । उनले भनेका छन्, ‘जो कोही कम्प्युटर साइन्समा संलग्न छन्, अहिले रिटायर हुनुपर्ने समय होइन।’
वास्तवमा यो गुगल संस्थापक ब्रिनको ठट्टायुक्त अभिव्यक्ति भएपनि यसले एआईको व्यवहार तथा प्रयोगकर्ता र एआई मोडेलबीचको सम्बन्धबारे गम्भीर प्रश्नहरू उठाएको छ। त्यसैले एआईसँग विनम्रता र धम्कीको प्रयोगले कस्तो भूमिका खेल्छ भन्ने विषय थप अनुसन्धानको विषय बन्ने देखिन्छ ।
